Hoppa i havet på årets varmaste dag i Bergen
Søndag stoppa gradestokken på 25,3 grader. Og meteorologen har meir godt nytt.
Sigrid Hardie (28) sjekkar at bikinien sit godt på før ho tek ein backflip frå bryggja på Marineholmen i Bergen.
Saman med Susanne Brandt Røssevold (28) har ho sprunge over Vidden på det som hittil er årets varmaste dag i Bergen.
Frå Montana til Fløyen tok turen 2,5 timar. Der vart det ein is.
– Det må ikkje bli for sprekt. Vi må ha litt balanse i livet, seier Røssevold.
Ullensvang varmast i Vestland
På det meste vart det målt 25,3 grader på målestasjonen på Florida. Det er opp frå fredag, som var førre toppnotering med 24,5 grader.
– Veldig digg, seier Roanna Hutcheson (25) om badetemperaturen på Marineholmen.
Ho pleier å bade om vinteren også.
– Det er mykje meir behageleg no, når det er varmare i lufta, konstaterer ho.
Aller varmast i Vestland søndag var Ullensvang med 27,1 grader. Etne var like bak med 26,5.
– Digg, men litt kaldt
På ein benk i sola har marinteknikkstudentar frå Høgskulen på Vestlandet slått seg ned.
– Strålande. Heilt nydeleg, seier Simen Myra Danielsen (22) om denne søndagen.
Han er akkurat ferdig med bachelorgraden og kan berre slappe av. Litt verre er det for kameraten Markus Tønnessen (25), som skal forsvare bacheloroppgåva om to dagar.
Han har likevel tatt seg tid til bad og soling.
– Det var digg, men litt kaldt. Ein blir ikkje verande uti, seier sørlendingen.
Hald deg oppdatert på badetemperaturane i Bergen her.
Solrik veke i vente
Det blir mykje bra vêr framover òg, sjølv om temperaturen søkk til 22 grader måndag.
– Det blir meir skya og ein del sol, men det kan kome nokre regnbyer på kvelden, seier meteorolog Eldbjørg Moxnes ved Vervarslinga på Vestlandet.
Resten av veka ser derimot heilt tørr ut, med stigande temperaturar.
– Det blir mykje sol, og fredag kan temperaturen igjen kome opp på 25 grader, seier Moxnes.
Karoline Weise (17) har planen klar for veka:
– Eg skal nyte vêret og bade masse. Eg elskar å bade! Og så skal eg bli brun, seier ho.
