Meny Lukk
Bli abonnent

Vi skriver om det som er viktig for unge i Bergen.

BT Junior er en abonnementstjeneste, men vi ønsker å gi deg en liten smakebit av innholdet. Derfor er denne artikkelen åpen for alle.

Allerede abonnent? Logg inn her.

Kvifor får ikkje pappa bu i Noreg?


       SAVN: Eg saknar pappa og veit ikkje når eg får sjå han igjen, skriv ung gut.
SAVN: Eg saknar pappa og veit ikkje når eg får sjå han igjen, skriv ung gut.
Jan H Andersen / Shutterstock / NTB scanpix (ILLUSTRASJONSFOTO)
?

Spør helsesøster

Pappa kom til Noreg, men fekk ikkje bli. Han er no i eit anna land. Der får han heller ikkje vera. Eg saknar pappa og veit ikkje når eg får sjå han igjen. Mamma seier vi ikkje kan besøke han, fordi vi ikkje veit kvar han skal vera framover. Eg tenker på pappa heile tida. Når eg er på skulen er det vanskelig å konsentrere seg. Eg får ikkje sove fordi eg tenker på pappa kvar kveld når eg skal legge meg. Kan du forklare meg kvifor pappa ikkje får vera i Noreg? Eg forstår det ikkje. Mamma seier pappa ikkje får vera her fordi ho ikkje har jobb. Ingen vil gje mamma ein jobb. -Gut som saknar pappa-

Helsesøster svarer

Mariann Enoksen

Hei,

Eg forstår at du saknar pappaen din og at det er vanskelig å forstå kvifor pappa ikkje får vera her i landet. Som helsesøster har eg møtt fleire familiar som ikkje kan leve saman, sjølv om dei gjerne ønskjer det. Det gjer vondt å sjå korleis saknet etter foreldra påverkar barna.

Veldig frustrerande

Det handlar om politikk. Eg kjenner ikkje til kvifor pappaen din ikkje får vera her. Dersom mamma har komme til Noreg fyrst og han skal komme etter, er det reglar som seier at den som er i Noreg må tene pengar før den andre kan komme etter. Eg har møtt mange kvinner som har gått på norskkurs og vert i praksis, men likevel ikkje får seg jobb etterpå. Dei søkjer og søkjer på arbeid, det er veldig frustrerande for dei. Når dei er aleine kan dei ofte berre jobbe på dagen, fordi dei må passe barna sine om kveldane og nettene.

Dei som lagar reglane for innvandring møter ofte ikkje barna og familiane til dei som ikkje får opphald, og ser korleis dette påverkar barna. Mest sannsynleg ville du sove betre og konsentrert deg meir på skulen dersom pappa var her med deg, då slapp du bekymre deg for kvar pappa er og kvar han skal reise. Pappa vil nok mest av alt at du og familien din skal ha det godt, sjølv om de ikkje kan vera saman i kvardagen.

Snakk med nokon

Eg tenker at det er svært viktig at du snakkar med nokon om saknet ditt og bekymringane dine. Sjølv om det å snakke om det som er vanskelig og vondt ikkje tek vekk saknet, kan det gjere at du handterer dei vonde følelsane du har litt betre. Når ein delar vanskelige tankar med andre, kan det gjere at det kjennes litt betre inni kroppen etterpå. Det at ein får hjelp til å handtere vonde tankar og følelsar når ein er barn, kan gjere at du får det betre seinare i livet som ungdom og vaksen. Dersom du bekymrar deg mykje som barn kan du få det vanskelig som vaksen.

Ta kontakt med helsesøster på skulen. Dersom du ikkje kjenner helsesøster kan du spørje læraren din eller mamma om dei kan hjelpe deg slik at du får snakke med henne. Alle som er helsesøster veit at det er viktig å snakke om det ein bekymrar seg for og tenker på.

Viktig å seie ifrå

Ein del barn som ikkje får vera med foreldra sine kan også bli sinte. Dei kan bli sinte på landet dei bur i, som ikkje vil la foreldra deira vera her saman med dei. Det er fint at du skriv om frustrasjonen din, skriving kan også hjelpe på dei vonde tankane ein har. Kanskje kan du skrive eit brev til statsministeren og dei som styrer landet vårt om korleis du har det? Det er viktig at du seier ifrå om korleis det påverkar deg og familien din at pappa ikkje får bu her. Når du seier ifrå til dei som styrer landet vårt, får dei meir kunnskap om korleis dette påverkar oppveksten din og andre barn som ikkje får vera med foreldra sine. På den måten kan dei som styrer landet vårt kanskje endre eller lage nye reglar i framtida.

Eg håper mammaen din får seg jobb og at pappa får komme til deg og familien snart.

Med vennlig helsing Helsesøster Mariann

Hva synes du?

Laster reaksjoner…
Hva mener du? Klikk her for å kontakte BT Junior.

Vi skriver om det som

er viktig for unge i Bergen.

BT Junior er en nettside der barn og unge kan oppdatere seg på nyhetsbildet, bli underholdt og bidra med meninger og innhold.

Engasjerende

Forklarende

Spennende

Underholdende