Arkitekturopprøret har kome til Bergen. Velkomen!

Men her vil dei møte ein uventa motstandar.

Arkitekturopprøret er ein gjeng snobbete nostalgikarar. Eller er dei kanskje vanlege folks talerøyr i møte med ein elite av arkitektar, utbyggjarar, byråkratar og politikarar?

Omtrent slik har debatten gått i land etter land dei siste par åra. Tysdag kveld kom denne rørsla for alvor til Bergen, i form av eit stappfullt folkemøte på Kvarteret.

I mine auge er det god grunn til å ønskje dei velkomen til Bergen.

• Landets vakraste by har mykje vi bør ta vare på.
• Det blir bygd for mykje stygt.
• Det er betre om opprørarane organiserer seg.

Då må dei nemleg stå til ansvar for synet sitt. Til no har rørsla stort sett blitt driven fram av ein Instagram-konto som frontar meiningar litt i hytt og pine. Det er mange meiningar om det nye Griegkvartalet. Men skal ein respektere nabobygget, altså Grieghallen, er ikkje eit bygg i blautkakestil det beste.